Nov
25
2017
Today
Cuaca Cilacap 29-08-2017

Berawan
Suhu : 24-320C
Angin : 5-25 km/jam
Cuaca Maritim
Agi Ngrekap Togel, Wong Desa Danasri Dicekel Pulisi Cetak
Senin, 08 Mei 2017 21:05

NUSAWUNGU, (CIMED) - Wong ketangkep pulisi merga dodolan nomer sing jenenge Togel wis ora etungan akehe, kiye koh esih ana maning sing kecekel. Kayonge pada ora ana kapoke. Rumangsane dodolan nomer marakna sugih tur ora kena ukuman ndean, ora ngertia wis dititeni nang pulisi. Titi mangsane limpe gari dicekel pulisi, ngandang nang sel.


Kaya sing dilakoni Supriyono (45) wong sekang Desa Danasri Kecamatan Nusawungu dina Setu (6/5/2017) wengi kecekel nang pulisi anggota Unit Reskrim Polsek Nusawungu.

"Pelaku ditangkep nang ngumahe dheweke pas agi ngrekap kasile dodolan togel," jere Kapolres Cilacap AKBP Yudho Hermanto liwat Kapolsek Nusawungu AKP Tusiran, Senen (8/5/2017).

Kapolsek Nusawungu, nyebutaken, sekang tangane Supriyono, petugas kasil ngrampas sebendel rekap togel, pulpen siji, selembar rekap nomer togel sing metu, selembar prediksi nomer sing metu, siji telpun gegem karo dhuit Rp 183.000.

Miturut AKP Tusiran, pengungkapan mau merga ana informasi sekang masyarakat sing gemlethek maring dodolan togel sing dilakoni nang pelaku. Sewise olih informasi, anggota Kanit Reskrim bareng karo anggotane dibantu anggota Bhabinkamtibmas Desa Danasri banjur ngecek bener orane lapuran mau.

"Bareng dicek jebul bener, nang ngumahe pelaku agi ngrekap kasil dodolan togel. Wengi kuwe uga, pelaku langsung dicekel sekalian ngrampas barang bukti," jere Kapolsek.

Pelaku wis ditetapaken dadi tersangka, siki wis ndekem nang njero sel Mapolsek Nusawungu karo nunggu proses ukuman. Tersangka Supriyono bakal kena ukuman sing lawase tekan pitung taun.

AKP Tusiran nambahaken, jajaran Polsek Nusawungu arep terus ningkatna operasi sing sasarane penyakit masyarakat (pekat) nggo ndadekna rasa aman nang wilayah Nusawungu.

 



Share on
Facebook! Twitter! Joomla Free PHP
 

Posting komentar anda