Dolanan Banyu Nang Rawa Bendungan, Bocah SD Ninggal Ketilem Cetak
Kamis, 10 Mei 2012 19:53

JERUKLEGI, (CIMED) – Sulton Ali Subhan (8), bocah warga RT 01 RW 03 Desa Tritih Wetan, Kecamatan Jeruklegi, ditemokaken ninggal kemambang nang sekitar pintu air Rawa Bendungan, Kamis (10/5/2012) kurang lewih jam setengah enem sore. Kayane korban ketilem nganti ninggal merga kepleset mlebu banyu jero pas dolanan banyu karo kanca-kancane.

Jasad bocah sing tembe kelas loro SD ditemokaken nang warga sekitar kono sing tes rampung bal-balan nang lapangan sing ora adoh karo pintu air Rawa Bendungan kuwe. Jasade banjur diangkat diterna maring keluargane nganggo mobile polisi.

“Ora ana sing ngerti persise awale bocah kuwe ketilem, ngerti-ngerti wis kemambang,” jere Wasno, esih keluargane korban.

Miturut dheweke, bar bali sekolah korban karo kanca-kancane kaya Kiki karo Candra sempat dolan maring umahe ninine Kiki nang Jalan Nakula, Kelurahan Gumilir numpak pit ontel. Banjur bar dzuhur bocah-bocah kuwe pada bali ngumah, tapi dipretungna bar kuwe langsung dolanan banyu nang Rawa Bendungan. Mungkin pas agi dolanan ngerti-ngerti kepleset, ndilalah kecemplung nang nggon banyu sing jero nang sekitar pintu air.

“Bar kedadean, Candra karo Kiki pada ora wani bali apa maning nglaporaken kedadean kuwe maring keluarga korban. Dadi korban ditemokaken ninggal nang warga kene bae sing tes rampung bal-balan,” nerusna.