Ditinggal Becer Nang Pasar, Montor Dicolong Maling Cetak
Minggu, 27 Mei 2012 08:15

CIMANGGU, (CIMED) – Ditinggal becer nang Pasar Genteng, Desa Panimbang, Kecamatan Cimanggu, pit montor Yamaha Mio R 4786 ZT nggone Dasmiti (38) warga Desa Panimbang, Cimanggu, ilang dicolong maling, Sabtu (26/5/2012). Montore dheweke diparkir nang sekitar warung mburi pasar, ora mira-mira padahal mung ditinggal limang menit thok. Mula bukane kedadeane, antarane jam wolu esuk korban kang ngumah numpak montor maring pasar Genteng arep becer. Montore diparkir nang sekitar warung mburi pasar, banjur korban genjlub meng pasar nggolet beceran.

Ora let suwe, antarane lima menitan korban rampung becer githir metu kang njero pasar tujuane maring montore sing diparkir. Dheweke ngrajug, mergane montore dheweke ora ana.

Takon nganah-ngeneh ora ana sing ngerti montore dheweke sapa sing nggawa. Rumangsa kelangan montor, dheweke banjur githir nglapuraken maring Polsek Cimanggu nggo diproses sebanjure.

Mulane pada sing ati-ati, parkir montor aja pada sembarangan, nggolet nggon sing aman tur ana pengawasan. Sing lewih penting, nggo njaga keamanan montore dipasangi kunci dobel. Mergane siki agi akeh wong kelangan pit montor.